मुगु। मुगुको मुगुम कार्माङ गाउँपालिकाको छायानाथमा ‘छायानाथ ट्रेल अल्ट्रा रेस २०२६’ हुने भएको छ।
एड्भेन्चर स्पोर्ट्स (साहसिक खेलकुद) मार्फत यहाँको पर्यटकीय सम्भावनालाई मूर्तरूप दिन मुगुम कार्मारोङ गाउँपालिकाको आयोजना र अल नेपाल स्पोर्ट्स फाउन्डेसनको सहकार्यमा आगामी ३ जेठमा ‘छायानाथ अल्ट्रा रेस’ आयोजना हुने भएको हो। नेपाल पर्यटन बोर्डको सभाहलमा बिहीबार पत्रकार सम्मलेन गर्दै गाउँपालिकाले रारा, छायानाथ धामसहित मुगुका पर्यटकीय क्षेत्रको समग्र पर्यटन विकास, पूर्वाधार विस्तार र स्थानीय समुदायको आर्थिक सशक्तीकरणमा टेवा पुर्याउने उद्देश्यले अल्ट्रा रेस आयोजना गरिएको हो।
गाउँपालिकाका प्रतिनिधिहरूले रारा र छायानाथ धाम आसपासका क्षेत्रलाई अन्तर्राष्ट्रियस्तरको आकर्षक गन्तव्यका रूपमा विकास गर्ने लक्ष्यसहित रणनीतिक कार्यक्रम ल्याइएको जानकारी दिएका छन्। पत्रकार सम्मेलनमा गाउँपालिका अध्यक्ष छिरिङ क्याप्रे लामाले पर्यटनलाई स्थानीय आर्थिक विकासको मुख्य आधारका रूपमा अघि बढाइने स्पष्ट पारे। उनले भने, “मुगु केवल प्राकृतिक सौन्दर्यको केन्द्र मात्र होइन, यो नेपालको पर्यटन सम्भावनाको प्रतीक पनि हो। यसलाई दिगो र व्यवस्थित रूपमा विकास गर्न हामी प्रतिबद्ध छौँ।”
यो रेस समुद्री सतहबाट २५५० मिटरबाट सुरु भई छायानाथ ४८२० मिटरको अल्टिच्युडसम्म करिब ३० किलोमिटरको रेस हुनेछ। प्रतियोगितामा सहभागी हुन इच्छुक खेलाडीले अनलाइनमार्फत आवेदन दिन सक्नेछन्। नेपाल एड्भेन्चर रनिङ महासंघको प्राविधिक सहयोग रहने यस प्रतियोगितामा मुगु जिल्लाका स्थानीय बासिन्दाका लागि छुट्टै विधा र सबैको सहभागितालाई प्रोत्साहन गर्न पाँच किलोमिटरको ‘फन रन’को समेत व्यवस्था गरिएको छ।
प्रतियोगिताका विजेतालाई नगद पुरस्कार, मेडल र प्रमाणपत्रद्वारा सम्मान गरिनेछ। ३० किलोमिटरको मुख्य विधा (महिला तथा पुरुष) तर्फ प्रथम हुनेलाई दुई लाख रुपैयाँ, दोस्रोलाई एक लाख ५० हजार, तेस्रोलाई एक लाख, चौथोलाई ७५ हजार र पाँचौँलाई ५० हजार रुपैयाँ नगद पुरस्कार प्रदान गरिनेछ। त्यसैगरी, स्थानीयतर्फ प्रथम, द्वितीय र तृतीय हुने खेलाडीलाई क्रमशः ३० हजार, २० हजार र १० हजार रुपैयाँ नगद पुरस्कारको व्यवस्था गरिएको छ।
पत्रकार सम्मेलनका क्रममा नेपाल पर्यटन बोर्डका निर्देशक लक्ष्मण गौतमले मुगुम कार्मारोडलाई साहसिक खेल पर्यटनको उत्कृष्ट गन्तव्य बनाउने यस अभियानले पर्यटन प्रवर्द्धनका साथै स्थानीय अर्थतन्त्रमा पनि योगदान पुग्ने बताएका छन्।
उनले उच्च अल्टिच्युडमा हुने साहसिक खेल गतिविधिले अन्तर्राष्ट्रिय रूपमा पनि छायानाथ धामसहित समग्र कर्णालीको पर्यटकीय गन्तव्य प्रबर्द्धान हुने जानकारी गराए। उनले भने, “यो निकै चुनौतीपूर्ण खेल गतिविधि भएकाले सावधानी अपनाउँदै सम्पूर्ण सरोकारवाला निकाय गम्भीर भएर सहयोग गर्नुपर्ने देखिन्छ।”
