सगरमाथा र बुद्ध, नेपाललाई विश्वभर चिनाउने दुई वटा नाम हुन् । विश्वको सबैभन्दा अग्लो हिमाल सर्वोच्च शिखर सगरमाथाले नेपाललाई हिमालयको देश बनाएको छ । अनि नेपालकै लूम्बिनीमा जन्मेका भगवान गौतम बुद्धका कारण पनि नेपाल शान्तिभूमिका रुपमा परिचित छ ।
तर पछिल्लो समय युवाहरुमा दुई चर्चित नाम छन्, घुमन्ते र सिर्जना सिज्जु । घुमन्ते नामले चिनिएका भोजपुरका कञ्चन राई सोलो ट्राभलर हुन् । जसले पहिलोपटक नेपालमा वर्षाको समयमा जोखिम मोल्दै घुमेर हरियाली नेपाल सबैलाई देखाउने सुन्दर कर्मको सुरुवात गरेका थिए ।
घुमन्ते नामले चर्चित कञ्चन राईले १५ वर्षअघि थालेको अभियानले अहिले हजारौँ नेपाली युवालाई सोलो ट्राभलर बनाएको छ । घुमेन्तैसँगै चर्चित अर्को नाम हो, सिर्जना ‘सिज्जु’ वली । नेपालको आधुनिक पर्यटनमा भोजपुरका कञ्चन राई र कर्णाली रुकुम पश्चिमकी सिर्जना सिज्जु अहिलेका सबैभन्दा शक्तिशाली ब्राण्ड हुन् ।
जसको काम र नाम नै ब्राण्ड बनेको छ । कञ्चन राई साथीहरुको समूह बनाएर घुम्न सुरु गरेका युवा हुन् । घुमन्तेको नामले चर्चित सो समूहले वर्षायाममा नेपालका सुन्दर पर्यटकीय ठाउँ पुगेर खिचेका फोटो तथा भिडियोले आधुनिक नेपाली पर्यटनको परिभाषामा नै बदलाव ल्याएको छ ।
तर कर्णालीकी सिर्जना सिज्जुको यात्रा भने फरक छ । उनी विशुद्ध सोलो ट्राभलर हुन् । अर्थात एक्लै घुम्ने घुमन्ते । त्यो पनि केटी मान्छे । कर्णालीमा छोरीचेलीलाई चुलोचौकोमै सीमित पार्ने परम्परा तोडेर सिज्जु एक्लै घुम्न निस्किने साहसिक ‘लेडी सोलो ट्राभलर’ हुन् ।
पाँच सात वर्षअघि उनले रहरै रहरमा सुरु गरेको सोलो ट्राभलर यात्रा आज उनको पेशा बनेको छ । घुम्न भनेपछि एक्लै भएपनि निस्किहाल्ने उनको स्वभाव नै आज नयाँ संसार बनेको छ । यही संसारमा रमाइरहेकी सिर्जना सिज्जुले आफूसँग भएको स्मार्ट फोनबाट घुम्ने योजना, रहर, घुमेको ठाउँको भिडियो बनाउन थालेकी हुन् । स्मार्ट फोनकै सहारामा उनले एक लाख सस्क्राइबर युट्युबमा बनाउन सफल बनिन् ।
त्यसपछि उनले क्यामेरा र गोप्रो किनिन् । आफ्नै लवजमा आफू घुमेको ठाउँको वर्णन गर्दै सुन्दर फोटो र भिडियो बनाउन थालेपछि उनको चर्चा बिस्तारै चुलिदै गयो । एक समय ‘जिरो’बाट सुरु भएको उनको ‘सोलो ट्राभलर’ करियर अहिले ‘हिरो लेडी’का रुपमा चर्चित छ । कुनै समय फेसबुकमा फ्लोअर्सका लागि भेटेका साथीभाईलाई ‘प्लिज एक लाइक गर्दिनुस्’ भन्ने सिज्जुका अहिले फेसबुक र युट्युबमा लाखौँ फ्लोअर्स, संस्क्राइबर अनि भ्युज छन् ।
रोचक पक्ष के भने कर्णालीमा जन्मे हुर्केकी सिज्जुले एक्लै घुम्ने अभियान पनि कर्णालीबाटै थालेकी हुन् । वन विज्ञान विषय पढ्न सहर पुगेकी सिज्जुले गाउँ गाउँ घुम्दै सुन्दर ठाउँको एक्सप्लोर गर्न थालेपछि युवाहरुको रोजाईमा परेकी हुन् ।
कर्णालीका चर्चित रारा, शे–फोक्सुन्डो ताल सबैले घुमिरहँदा उनी जुम्ला, डोल्पा र रुकुम पश्चिमका अग्ला तथा विकट ठाउँका पर्यटकीय क्षेत्र घुम्न हिडिन् । जहाँ पुग्न कोही मान्दैनथे । उनले हिम्मत गरिन् । पुरुषै पुरुष साथी, सरोकारवाला र गोठालासँग कैयौँ दिन गोठमै बास बसेर पनि उनले कर्णालीका ‘स्काई लेक’ अर्थात आकाशे ताल र प्रेम तालको ‘एक्स्प्लोर’ गरिन् ।
यी दुई ताल उनी आफैँले नामाकरण गरेकी हुन् । कर्णालीमा रारा र शे–फोक्सुन्डो ताल मात्रै देख्नेहरुका लागि सिज्जुले जुम्लाको गुठीचौर, सिँजा उपत्यका, अनि आकाशे ताल, प्रेम ताल र गिडीदहको ‘एक्स्पलोर’ गरेर कर्णालीका गुमनाम पर्यटकीय क्षेत्र चर्चामा ल्याएकी हुन् ।
उनको सबैभन्दा ठूलो साहस र शक्ति भनेकै उनी एक्लै हिड्न सक्छिन् । एक्लै आफूले घुम्ने चाहेको ठाउँमा पुग्न सक्छिन् । अनि त्यो ठाउँ पुगेर सुन्दर फोटो र भिडियो ‘तिमी केटी मान्छे एक्लै जान सक्दैनौँ’ भन्नेहरुलाई देखाउन सक्छिन् ।
घुम्न भनेपछि सबथोक बिर्सिने सिज्जुको साहसले आज नेपालको पर्यटनमा युवाहरुमाझ नयाँ आयाम थपेको छ । घुम्नलाई साथी नै चाहिने परम्परा सिज्जुले तोडेकी छन् । अनि एक्लै पनि सुन्दर ठाउँ घुमेर आउन सकिन्छ भन्ने उदाहरण नेपाली युवाहरुमाझ पेश गरेकी छन् ।
उनको अर्को विशेषता भनेको युवाहरुले अरुसँग मागेर, गुनासो गरेर, घुर्की लगाएर समय बर्बाद गर्नुभन्दा आफूसँग जे छ, जहाँ छ, त्यहीबाट सुरु गरेर आफ्नो सफलताको बाटो आफैँ बनाउन सकिन्छ भन्ने हो । उनीभन्दा पहिले नेपालमा युवतीहरु एक्लै घुम्न डराउँथे । घुम्न गएपनि साथीभाईको गठजोड, जम्बो टिम अनिवार्य मान्थे । घरबाट भागीभागी, झुटो बोली बोली जाने बाध्यता थियो ।
खासगरि छोरी मान्छेका लागि बाहिर घुम्नु प्रतिबन्ध जस्तै थियो । तर सिर्जना सिज्जुले पहिलोपटक यो परम्परा तोडिन् । युवती आफ्नै हिम्मत र बलमा खुलेआम घुम्न सक्छन् भन्ने नयाँ सोच र शैली स्थापित गरिन् । खासगरी युवतीहरु आज सिर्जना सिज्जुलाई आइडल मानेर सयौँ ‘सोलो लेडी ट्राभलर’ बनेका छन् । राम्रा राम्रा फोटो र भिडियो खिचेर सामाजिक सञ्जालमा आफ्नै बेग्लै परिचय र ब्राण्ड बनाइरहेका छन् ।
सिज्जु पछिल्लो समय आफू घुमघाम गरेको ठाउँको फोटो, भिडियो र भ्लग हालेर युट्युबबाट राम्रै पैँसा कमाइरहेकी छन् । सुरुमा केही समस्या र कठिनाई झेलेकी उनले अहिले आफ्नो संसार आफैँले सुन्दर तबरले चलाइरहेकी छन् । नेपालका प्राय ठाउँ घुमेर उनले हरेक दिन नयाँ कीर्तिमान बनाइरहेकी छन् ।
उनी नेपालको पहिलो चर्चित ‘लेडी सोलो ट्राभलर’ हुन् । जसको चर्चा र सफलतालाई नेपाल पर्यटन बोर्डले समेत आत्मसाथ गर्दै उनका पर्यटकीय क्षेत्रका भिडियोहरु अफिसियल रुपमा नेपाल पर्यटन बोर्डका पेजहरुबाट प्रवर्द्धन गरिररहेको छ ।
नेपालको पर्यटन प्रवर्द्धन गर्ने पर्यटन बोर्डले पहिलोपटक एक्लै घुम्ने महिला सोलो ट्राभलरका भिडियो खरिद गरेर आफ्ना पेजहरुबाट ब्राण्डिङ गरिरहेको हो । यो साहस, संघर्ष र सफलताले उनको मात्रै होइन, नेपालमा घुम्न रुचाउने, घुम्न चाहने र घुम्ने जीवनशैलीलाई आफ्नो पेशा बनाउन चाहने हरेक युवा युवतीका लागि ठूलो अवसर र सम्भावनाको ढोका खोलेको छ ।
