सुर्खेत। संघीय सरकारले घोषित गरेको कर्णाली कोरिडोर अन्तरगत हुम्लाको खार्पुनाथस्थित चुवा खोलामा निर्माण गरिएको बेलीब्रिज उद्घाटन कार्यक्रम असहज मौसमका कारण अन्योलमा परेको छ।
उद्घाटनका लागि प्रधानमन्त्री केपी शर्मा ओली आइतबार बिहान सुर्खेत आइपुगे पनि हुम्लातर्फको उडान स्थगित भएपछि कार्यक्रम तोकिएको समयमा सम्पन्न हुन सकेन।
प्रधानमन्त्री ओलीसँगै प्रदेश सरकारका मुख्यमन्त्री यामलाल कँडेलको पनि सहभागिता रहने भनिएको यो कार्यक्रम संघ–प्रदेश समन्वयको एउटा नमुना बन्ने अपेक्षा गरिएको थियो। तर, मौसमको प्रतिकूलताले योजना अनुसार कार्यान्वयन हुन नसक्दा कार्यक्रम प्रतीक्षामा राखिएको छ।
कालिकोट खण्ड हुँदै हुम्ला जाने हवाई मार्ग अवरुद्ध हुँदा प्रधानमन्त्रीको टोली हाल वीरेन्द्रनगरस्थित नेपाली सेनाको उत्तर–पश्चिम मुख्यालय नेवारेमा अस्थायी विश्राममा रहेको छ।
बेलीब्रिज उद्घाटन कार्यक्रम ११ बजेका लागि तय गरिएको थियो। उक्त पुललाई कर्णालीका दुर्गम भेगहरूमा यातायात सहज बनाउने लक्ष्यसहित निर्माण गरिएको हो।
तर यस्तो किसिमको आयोजना समयमै सम्पन्न हुन नसक्नु सरकारको व्यवस्थापन क्षमताप्रति प्रश्न उठाउने विषय भएको स्थानीय विश्लेषकहरू बताउँछन्। मौसमजस्तो प्राकृतिक कारक बाहेक पूर्वतयारी, वैकल्पिक योजना र आकस्मिक व्यवस्थापनको कमीले नेतृत्व असहज अवस्थामा परेको तीतो यथार्थ देखिएको छ।
अब मौसममा सुधार आएपछि प्रधानमन्त्री ओलीको टोली हुम्लातर्फ प्रस्थान गर्ने तयारीमा रहेको जनाइएको छ।
