काठमाडाैँ। अमेरिकाको पूर्वी तटमा करिब एक दशकयताकै सबैभन्दा ठुलो मानिएको हिमआँधी आइतबारदेखि तीव्र रूपमा प्रवेश गरेपछि न्यूयोर्क सिटी शहरसहित विभिन्न क्षेत्रमा आपतकाल घोषणा गरिएको छ ।
मौसम पूर्वानुमानअनुसार आँधी सोमबार दिउँसोसम्म जारी रहने अपेक्षा गरिएको छ । करिब चार करोड मानिस हिमआँधीको चेतावनीको दायरामा परेका छन् ।
जसमा बोष्टन, फिलाडेल्फिया र लङ टापु क्षेत्र समावेश छन् । थप एक करोड ९० लाख मानिसका लागि भने शीतकालीन आँधीको चेतावनी जारी गरिएको छ । अमेरिकी राष्ट्रिय मौसम सेवाका अनुसार कतिपय स्थानमा २४ इन्चसम्म हिमपात हुन सक्ने अनुमान छ ।
स्थानीय समयअनुसार सोमबार मध्यरातसम्म उत्तर–पूर्वी क्षेत्रमा धेरै ठाउँ बाक्लो हिमले ढाकिसकेको थियो । न्यूयोर्क र न्यु जर्सीका केही स्थानमा १० इन्चसम्म हिउँ जमेको रिपोर्ट गरिएको छ ।
न्यूयोर्क सिटीका मेयर जोहरना ममदानीले आइतबार राति ९ बजेदेखि सोमबार दिउँसो १२ बजेसम्म नगरका पाँचै क्षेत्रमा अत्यावश्यकबाहेक सबै सवारी साधनमा प्रतिबन्ध लगाएका छन् । आपतकालीन सेवाबाहेक सडक, राजमार्ग र पुलहरू बन्द गरिएका छन् । सबै विद्यालय सोमबारका लागि बन्द गरिएको छ । प्रतिबन्धमा खाना डेलिभरीमा प्रयोग हुने इ–बाइकसमेत समेटिएका छन् ।
अधिकारीहरूले अनावश्यक यात्रा नगर्न कडा आग्रह गरेका छन् । ‘आफ्नो सुरक्षाका लागि घरमै बस्नुहोस् र सडकबाट टाढा रहनुहोस्,’ मेयर ममदानीले भनेका छन् ।
हिमआँधीले हवाई उडानहरूमा पनि ठुलो असर परेको छ । उडान ट्र्याकिङ वेबसाइट फ्लाइटअवेयरका अनुसार सोमबार मात्रै अमेरिकाभित्र, भित्रिने वा बाहिरिने गरी ५ हजारभन्दा बढी उडान रद्द भएका छन् । यसअघि जनवरी १९ देखि सुरु भएको तीन साताको कठोर चिसो लहरका कारण १९ जनाको मृत्यु भएपछि यो वर्ष न्यूयोर्कमा आएको यो दोस्रो ठुलो शीत आँधी हो।
