वासिङटन डीसी । अमेरिकी राष्ट्रपति डोनाल्ड ट्रम्पले मंगलबार आफ्नो ‘स्टेट अफ द युनियन’ सम्बोधन गर्न लागिरहेका छन् ।
यस अघि स्वतन्त्र मतदातामाझ उनको लोकप्रियता नयाँ न्यून स्तरमा झरेको सर्वेक्षणले देखाएको छ । एसएसआरएसद्वारा सञ्चालित सीएनएनको नयाँ सर्वेक्षणले राष्ट्रपतिको प्राथमिकता र नीतिप्रति जनतामा बढ्दो शंका रहेको देखाएको छ ।
सर्वेक्षणअनुसार केवल ३२ प्रतिशत अमेरिकीले ट्रम्पले सही प्राथमिकता लिएको बताएका छन् । ६८ प्रतिशतले उनले देशका महत्त्वपूर्ण समस्यामा पर्याप्त ध्यान नदिएको ठानेका छन् । यो सूचकाङ्क ट्रम्पका दुवै कार्यकालमध्ये सबैभन्दा नकारात्मक हो । त्यस्तै ६१ प्रतिशत उत्तरदाताले उनका नीतिले देशलाई गलत दिशातर्फ लैजाने बताएका छन् । जबकि ३८ प्रतिशतले मात्र सही दिशामा जाने विश्वास व्यक्त गरेका छन् ।
समग्र वयस्क अमेरिकीमा ट्रम्पको कार्यसम्पादन अनुमोदन दर ३६ प्रतिशतमा सीमित छ, जुन गत शरददेखि ४० प्रतिशतभन्दा तल नै छ । करिब आधा उत्तरदाताले उनको कामप्रति कडा असन्तुष्टि व्यक्त गरेका छन् भने १९ प्रतिशतले मात्र कडा समर्थन जनाएका छन् । गत वर्ष कंग्रेसलाई सम्बोधन गर्दा ट्रम्पको अनुमोदन दर ४८ प्रतिशत थियो, जुन उनको करियरकै उच्च हो । त्यसयता उनले अधिकांश जनसाङ्ख्यिक समूहमा समर्थन गुमाएका छन् । रिपब्लिकन समर्थक, रूढीवादी मतदाता र कलेज शिक्षा नभएका श्वेत अमेरिकीहरूमा भने अझै सकारात्मक झुकाव देखिएको छ ।
विशेष रूपमा ल्याटिनो अमेरिकीहरूमा ट्रम्पको समर्थन १९ अङ्कले घटेको छ भने ४५ वर्षमुनिका मतदातामा १८ अङ्कले गिरावट आएको छ । स्वतन्त्र मतदातामाझ उनको अनुमोदन दर गत वर्षको तुलनामा १५ अङ्कले झरेर २६ प्रतिशतमा पुगेको छ, जुन उनका दुवै कार्यकालमध्ये सबैभन्दा कम हो ।
राष्ट्रपतिका लागि चिन्ताजनक अर्को सङ्केत रिपब्लिकन आधारमा आएको नरमी हो । सर्वेक्षणमा रिपब्लिकन मतदातामध्ये कडा समर्थन ४९ प्रतिशतमा झरेको छ, जुन गत वर्षको कंग्रेस सम्बोधनपछि रहेको ६४ प्रतिशतभन्दा निकै कम हो ।
करिब तीनमध्ये एक रिपब्लिकनले ट्रम्पले मुख्य समस्यामा पर्याप्त ध्यान नदिएको बताएका छन् । १६ प्रतिशतले उनका नीतिले देशलाई गलत दिशामा लैजाने बताएका छन् ।
यसैबिच अमेरिकीहरू राष्ट्रपतिले आफ्नो सम्बोधनमा मुख्य रूपमा अर्थतन्त्र र जीवनयापनको लागतबारे बोलुन् भन्ने चाहिरहेका छन् । ५७ प्रतिशत उत्तरदाताले यही विषय प्राथमिक रहेको बताएका छन्, जुन अन्य कुनै पनि मुद्दाभन्दा चार गुणा बढी हो । डेमोक्रेटमध्ये आधाले, स्वतन्त्र मतदातामध्ये ५६ प्रतिशतले र रिपब्लिकनमध्ये ६५ प्रतिशतले पनि अर्थतन्त्रलाई प्राथमिक मुद्दा मानेका छन् ।
सर्वेक्षणले आगामी मध्यावधि निर्वाचनअघि ट्रम्प प्रशासनका लागि चुनौतीपूर्ण राजनीतिक वातावरण देखाएको छ । यद्यपि ‘स्टेट अफ द युनियन’ सम्बोधनमा प्रायः राष्ट्रपतिका समर्थक बढी दर्शक हुने भएकाले ट्रम्पलाई आफ्ना समर्थक पुनः सक्रिय पार्ने अवसर भने रहने विश्लेषण गरिएको छ ।
