कालिकोट। लगातारको वर्षासँगै गएको पहिरोका कारण अवरुद्ध भएको कर्णाली राजमार्गअन्तर्गत सुर्खेत–जुम्ला सडक खण्ड एक सातापछि सञ्चालनमा आएको छ।
पहिरोले भत्काएको सडक मुनिको पर्खाल पुनर्निर्माणसँगै नेपाली सेनाको सहयोगमा गरिएको विस्फोटपछि ठूला मालबाहक गाडीहरू गन्तव्यतर्फ लागेका छन्।
कालिकोटका प्रहरी प्रमुख टेक बहादुर रावतका अनुसार, पर्खाल भत्किएपछि ठूला गाडी एक साता जति अलपत्र परेका थिए। "साना गाडीहरू केही पास भइरहेका थिए, तर ट्रकहरू ताडी, पिली, वाली, गाल्जे र नाग्मा बजारमा थुनिएका थिए," उनले जानकारी दिए।
पहिरो पन्छाउन सडक डिभिजन कार्यालय जुम्लाले दुईवटा ब्रेकर मेसिन प्रयोग गर्यो तर सफल नभएपछि शुक्रबार कम्प्रेसर मेसिनमार्फत होल खोपेर नेपाली सेनाले विस्फोट गरेपछि मात्र सडक सञ्चालनमा ल्याइएको हो।
प्रमुख जिल्ला अधिकारी नारायण प्रसाद भट्टराई भन्छन्, “कर्णालीमा एउटा ढुङ्गा हटाउन पनि करोडौं रुपैयाँ खर्चिनुपर्ने अवस्था छ।”
स्थानीय प्रशासन र सेनाको प्रयासपछि बाटो खुले पनि आधारभूत पूर्वाधार कमजोर भएकाले वर्षा सुरु भएसँगै यस्तो समस्या दोहोरिने चिन्ता बढ्दो छ। तीन साताअघि पनि सोही स्थानमा पहिरो जाँदा डिभिजन कार्यालयले पर्खाल निर्माण गरी आवागमन सुचारु गरेको थियो। तर पुनः अवरुद्ध भएपछि संकट झनै गहिरिएको छ।
व्यवसायी रतन महताराका अनुसार आर्थिक वर्ष सकिने समयमा निर्माण सामग्री बोकेका ट्रकहरू बाटैमा रोकिए। ट्रक चालक नवीन विश्वकर्माले सात दिनको पर्खाइपछि बल्ल जुम्लातर्फ प्रस्थान गर्न पाएको बताए।
स्थानीय बासिन्दा र उद्यमीहरू भने सडकको गुणस्तरीय निर्माण नहुँदा वर्षेनी पहिरोका कारण ज्यान र धन जोखिममा पर्ने बताउँछन्। मान्म बजारका व्यापारी बबुर शाहीले भने, “कर्णालीमा वर्षा सुरु हुनासाथ सडक बन्द हुने डर हुन्छ। बाटो बलियो नभएकोले हामी जहिल्यै समस्यामा पर्छौं।”
कूल २३३ किलोमिटर लम्बाइको कर्णाली राजमार्गमा नाग्मा–जुम्ला खण्ड तुलनात्मक रूपमा राम्रो भए पनि कालिकोट र दैलेख खण्ड हिलाम्मे, धुलाम्मे र कमजोर पर्खालले भरिएको छ।
सडक अवरुद्ध हुँदा जुम्ला, मुगु तथा सुर्खेत, दैलेख बीचको जीवन र आपूर्तिमा प्रत्यक्ष असर परेको हो। स्थायी समाधान नखोजिएसम्म हरेक मनसुनमा कर्णालीवासीलाई यस्तो सास्ती सहनुपर्ने बाध्यता देखिएको छ।
