काठमाडौं- नेपाली सिने क्षेत्रमा चासोको विषय बनेको सिनेमा ‘सिटामोल’ यतिबेला आफ्नो प्रचार अभियानलाई लिएर चर्चामा छ।
आगामी साउन २३ गतेबाट देशभर प्रदर्शनमा आउन लागेको सिनेमा हाल विभिन्न टेलिभिजन शो र मिडियामार्फत व्यापक प्रचारप्रसारमा जुटेको छ। हालै मात्र ‘कमेडी नाइट विथ च्याम्पियन’ मा सहभागिता जनाएको टिमले दर्शकहरूसँग प्रत्यक्ष सम्पर्क बढाउने प्रयास गरिरहेको छ।
यसै क्रममा सार्वजनिक भएको सिनेमाको ‘झुम्का कानैमा’ गीत र गत हप्ता रिलिज गरिएको टिजरले दर्शकमाझ सकारात्मक हाइप सिर्जना गर्न सफल भएका छन्। दुबै सामग्रीले १० लाखभन्दा बढी दर्शकको साथ पाइसकेको छ भने, दर्शकहरूले अभिनेता सौगात मल्ल र बेनिशा हमालबीचको रसायनलाई विशेष रुचाएका छन्।
‘झ्यानाकुटी’ पछि पुनः पर्दामा देखिएको यो जोडीले दर्शकमा पुनः पुरानो र समर्पित केमिस्ट्रीको अनुभूति दिलाएको छ। प्रचार सामग्रीप्रति मिलेको उत्साहजनक प्रतिक्रियाले निर्माण टोलिलाई थप हौसला दिएको छ।
सिनेमामा अभिनय गर्ने कलाकारहरूमा सौगात र बेनिशासहित श्रीकृष्ण निरौला, जानुका विश्वकर्मा, लोकेन्द्र लेखक, भूगोल कार्की, हिउँवाला गौतम, सुशील पोखरेल, दिनेश रेग्मी, आरआर खड्का, ज्ञानु मल्ल, पवन भट्टराई, काजल भुजेल, बालकलाकार करण नेपाली र आराध्या राज्यलक्ष्मी डिसी छन्। श्रीकृष्ण र जानुकाको यो डेब्यु सिनेमा हो।
निर्माण पक्षमा तुल्सी देवी फिल्म प्राली र जुनतारा फिल्मस्को सहकार्य रहेको छ। सिनेमा प्रदीप भट्टarai र निर्देशक साने मिलेर लेखेको कथामा आधारित छ। सिमोस सुनुवारको प्रस्तुति रहेको सिनेमामा भूगोल कुमार कार्की र विकाश राज जोशी निर्माता छन् भने अप्सरा नेपाली, अजय मल्ल, कुमार केसी कार्यकारी निर्माता र गंगाराम श्रेष्ठ सह-निर्माता हुन्।
प्राविधिक पक्षमा संगीत बाबुल गिरी, कोरियोग्राफी कविराज गहतराज, सम्पादन बन्दे प्रसाद, कलर राजेन्द्र मोक्तान, साउण्ड मुकेश शाह, द्वन्द्व निर्देशन देव महर्जन र शंकर महर्जन, पोस्टर डिजाइन राकेश दाहाल, र सिनेमाटोग्राफी दिव्य सुवेदीले सम्हालेका छन्।
सिनेमा ‘सिटामोल’ साउन २३ गतेबाट देशभर प्रदर्शनमा आउनेछ।
