काठमाडौँ। नेपाली चलचित्र इतिहासमा एक विशेष स्थान राख्ने फिल्म माइतीघरको चर्चित गीत ‘वसन्त नै बस्न खोज्छ’ पुनः नयाँ स्वरूपमा निर्माण भइरहेको माइतीघर फिल्ममा समावेश गरिने भएको छ।
उक्त गीतको छायाङ्कन आइतबारदेखि बागलुङको कालिका मन्दिरमा सुरु भएको छ। सार्वजनिक गरिएका तस्बिरहरूमा उपासना सिंह ठकुरी र श्यामाश्री शेर्पा कोरस डान्सरसँग देखिएका छन्।
गीतलाई भारतीय गायिका सञ्जीवनीको स्वरमा पुनः रेकर्ड गरिएको छ। छायाङ्कन ५ दिनसम्म मन्दिर आसपासमै हुने बताइएको छ। कमल राई, जो नेपाली फिल्म क्षेत्रका अनुभवी कोरियोग्राफर हुन्, गीतमा कलाकारलाई नचाउने जिम्मेवारीमा छन्।
फिल्मका निर्माता रोहित अधिकारीले गीतको मर्म र भावलाई जीवन्त राख्न पुनः रेकर्ड गरिएको बताए। "गीतको अडियो मात्र होइन, भिडियो पनि उत्कृष्ट हुनेछ", निर्माता अधिकारीले जानकारी दिए। गीतमा किरण खरेलको शब्द र जयदेवको सङ्गीत रहेको छ।
नयाँ माइतीघर फिल्ममा धीरज मगर, केदारप्रसाद घिमिरे ‘माग्ने बुढा’, प्रकाश सपुत, उपासना सिंह ठकुरी, श्यामाश्री शेर्पा, बुद्धि तामाङ, शिशिर बाङ्देल लगायत कलाकारको अभिनय समावेश छ।
फिल्म मिलन तामाङको निर्देशनमा निर्माण भइरहेको छ भने छायाङ्कन सुसन प्रजापतिले गरिरहेका छन्। रोहित अधिकारी फिल्मस्को ब्यानरमा निर्माण भइरहेको फिल्ममा रोहित अधिकारी, रविन शेरचन, र धीरज तामाङ निर्माता रहेका छन्।
